Ստոմատոլոգիա, Իմպլանտացիա, Էսթետիկ բժշկություն

Հաճախ հանդիպող ատամնաբուժական հարցեր

• Երեխաների ատամները բուժելիս սառեցնելով կամ փչելով չե՞ք կարող ցավազրկել։
  Փչելով կամ  սառեցնելով անզգայացման արդյունավետությունն ու երկարատևությունն այդքան էլ մեծ չէ։

  Այսպիսի անզգայացումները կիրառվում են միայն որոշ միջամտությունների ժամանակ (օրինակ՝ ասեղի ծակոցի տեղում, որպեսզի ծակոցը չզգացվի), իսկ մնացած միջամտությունների ժամանակ կիրառվում են այլ մեթոդներ(ներարկումային անէսթեզիա, նարկոզ(ինհալացիոն և ոչ ինհալացիոն)։

  Սրանք ավելի արդյունավետ են, և երեխան բացարձակ չի ունենում  ցավային զգացողություն։
• Ես ունեմ ընդամենը 1-2 թեք ատամ, կարո՞ղ ենք միայն մեկ ծնոտին բրեկետներ ֆիքսել։
  Եթե կան 1-2 թեք ատամներ, դա նշանակում է, որ հարևան ատամները նույնպես ինչ-որ չափով տեղաշարժվել են և կծվածքի թեկուզ փոքր, բայց խանգարումներ կան։

  Այս պարագայում միանշանակ պետք է ֆիքսել և՛ վերին, և՛ ստորին ծնոտին բրեկետներ։ Բրեկետային բուժումն արվում է ինչպես առանձին ատամների ուղղման, այնպես էլ կծվածքի շտկման համար։

  Եվ առհասարակ, օրթոդոնտիկ բուժումը ճիշտ և արդյունավետ է, եթե երկծնոտանի բուժում է իրականացվում։

  Մեկ ծնոտանի բուժման դեպքում  միայն ատամնաշարն է  ուղղում, իսկ կծվածքային շեղումները մնում են։
• Իմաստության ատամը հեռացնե՞լ, թե՞ բուժել։
  Իմաստության ատամները սովորաբար ծկթում են  17-25 տարեկանում, որոշ դեպքերում էլ՝ ավելի ուշ։

  Ատամի ծկթելը  կարող է ուղեկցվել ցավերով և տհաճ զգացողություններով։ 

  Ցավի պատճառն այն է, որ 8-րդ (իմաստության) ատամի լինդը ավելի հաստ է, ինչպես նաև չկա բավարար տեղ ատամի ծկթելու համար։

  Բացի նրանից, որ իմաստության ատամի դուրս գալը ցավոտ է, այն նաև երբեմն վատ հետևանք է թողնում ամբողջ ատամնաշարի վրա. բավարար տեղ չունենալու պատճառով կարող  է հանգեցնել ֆրոնտալ (դիմացի) ատամների խճողման։

  Ատամնաշարի վերջում գտնվելու պատճառով միշտ չէ, որ  հնարավոր է լինում իմաստության  ատամը լիարժեք  մաքրել ատամները լվանալիս.  արդյունքում այդ ատամները շուտ են փչանում։

  Այս ատամների բուժումը դժվար է ոչ միայն իրենց անհարմար դիրքի, այլև ատամի արմատների բարդ ու ծուռ կառուցվածքի պատճառով։

  Ուստի միշտ չէ, որ հնարավոր է կատարել որակյալ պլոմբավորում և հիմնականում ցուցված է հեռացնել։